ISLAMABAD: Turkiya ka aala satahi wafd Federal Minister for Commerce Jam Kamal Khan se mila jis mein aviation, defence manufacturing aur high-tech industries mein taawun par baat cheet hui.
Tafseelaat ke mutabiq, Turkiya ke wafd ne Pakistan mein joint ventures, technology transfer aur manufacturing capacities qaim karne mein gehri dilchaspi ka izhar kiya. Turki companies ne kaha ke woh Pakistan ko regional markets ke liye ek strategic production hub ke taur par dekh rahi hain.
Jam Kamal Khan ne dono mulkon ke darmiyan industrial aur economic ties ko mazboot banane ki zaroorat par zor diya. Unhon ne aerospace, defence production, minerals aur dual-use manufacturing mein wasee imkanat ko bhi ujagar kiya.
Pakistan ki janib se Turki companies ko strategic production partner banne ka mashwara diya gaya, jabke Turkiya ke wafd ne Pakistan ke strategic vision ki tareef ki aur long-term cooperation ki khwahish ka izhar kiya.
Donon fereeqeen ne B2B linkages, investment-based industrial partnerships aur technological cooperation barhane par bhi ittifaq kiya.
