BEIJING: President Donald Trump ki janib se Venezuela ke liye oil tankers par blockade ke elaan ke baad Asian trade mein oil prices qareeban ek dollar barh gaye hain, jab ke mulk se aksar oil exports abhi tak ruke hue hain۔
US West Texas Intermediate (WTI) crude ki qeemat 98 cents ya 1.7% izafay ke sath $56.89 per barrel tak pohanch gayi, jab ke shuru mein is mein ek dollar se zyada ka izafa dekha gaya.
Isi tarah Brent crude bhi 92 cents ya 1.54% barh kar $60.60 per barrel par band hui۔
Trump ne mangal ke roz elaan kiya tha ke Venezuela mein dakhil aur nikalne wale tamam sanctioned oil tankers par blockade lagaya ja raha hai aur President Nicolas Maduro ki hukumat ko foreign terrorist organization qarar diya gaya, jab ke is blockade ke nafaz ke tareeqe par wazahat nahi ki gayi.
Zarai aur customs data ke mutabiq, blockade ke baad budh ke roz Venezuelan oil exports zyada tar moattal rahe, halanke riyasati oil company PDVSA ne cyberattack ke baad crude aur fuel ki loading dobara shuru kar di thi.
Is dauran Chevron ke jahaz purani US Government ki ijazat ke tehat America rawana hotay rahe.
IG market analyst Tony Sycamore ne kaha ke agarche blockade ke enforcement details wazeh nahi, lekin Maduro regime ke khilaf US pressure mein ghair mutawaqqa izafay ne supply disruption ke khadshat paida kar diye hain, jis se oversold market mein short covering shuru ho gayi.
Guzishta haftay America ne US Coast Guard ke zariye Venezuela ke qareeb se supertanker Skipper ko qabze mein liya tha, jo Venezuela se oil cargo ki pehli US seizure thi.
Blockade ki khabar ke baad budh ke roz oil prices mein 1% se zyada izafa dekha gaya, jab ke is se pehle Ukraine peace talks ke hawalay se Russian sanctions mein narmi ke imkanaat par prices paanch saal ki kam tareen satah tak gir gaye thay.
Zarai ke mutabiq, Venezuelan crude global supply ka qareeban 1% hai aur zyada tar China jata hai, lekin Asia mein kamzor demand aur floating storage mein zyada crude mojood hone ki wajah se duniya ke sab se baray importer par is ka asar mehdood rehne ka imkaan hai.
Isi doran UK ki oil aur gas company BP ne elaan kiya hai ke Australia ki Woodside Energy ki CEO Meg O’Neill ko 1 April se BP ka naya CEO muqarrar kiya ja raha hai, jo is baat ka ishara hai ke company renewable initiatives kam kar ke dobara oil aur gas strategy par focus kar rahi hai.
