Karachi: Thatta Cement Company Limited ne announce kiya hai ke uski wholly owned subsidiary “Minsk Work Tractor & Assembling (Private) Limited (MWTA)” ne Republic of Belarus ki company OJSC Minsk Tractor Works ke sath ek Exclusive Agreement sign kiya hai.
Is moahide ke tehat, MWTA ko Balochistan mein Belarus tractors assemble aur locally produce karne ke exclusive rights mil gaye hain.
Project ka maqsad Balochistan mein local industrial development ko promote karna, rozgar ke naye moqe paida karna aur technology transfer ko barhawa dena hai.
Company ke mutabiq, yeh agreement Thatta Cement Group ke business portfolio ke liye aik strategic aur positive development hai, jo uske long-term growth aur diversification par acha asar dalega.
Yeh moahida Balochistan mein tractor assembly facility establish karne ka pehla qadam hai, jo mustaqbil mein local agriculture aur industry dono ke liye faida mand sabit hoga.
