Pakistan ke energy ke bare projects industrial development ko nayi direction de rahe hain.
National Grid Company (NGC) ne Sheikhupura mein 220 kW Quaid-e-Azam Business Park Grid Station ko kamyabi se functional kar diya. Yeh qadam Sheikhupura Special Economic Zone mein bare industrial users ke energy needs ko pura karne ke liye strategic ahmiyat ka haamil hai
Yeh project, jis par 4 arab rupay se zyada ki cost ayi, industrial users ko bila ta’tul bijli farahm karega aur maeeshat ki sargrmiyon ko taqat dega. Yeh mulk ka pehla grid station hai jo khaas tor par Special Economic Zone ke liye commission kiya gaya.
Yeh intizam barqi nizam ko mustahkam banane, voltage ka tawazun behtar karne aur bhari industrial load ki mo’asar bardasht ko yaqini banane mein madadgar hoga.
NGC ke Managing Director, Engr. Altaf Hussain Malik ke mutabiq, special economic zones ke liye modern power infrastructure sar-maya kari aur rozgar farahm karne mein kirdar ada karta hai.
NGC ne December mein 500 kW Lahore North Grid Station ko bhi functional kar ke Punjab ka high-voltage transmission system mazid mazboot banaya. SIFC ki marboot sahulat kari ke natije mein in projects ki bar waqt takmeel qaumi taraqqi aur maeeshi istehkam ki raah mein aham peshraft hai.
