Karachi: Shadab Textile Mills Limited ne apne shareholders aur stakeholders ko yeh wazeh kiya hai ke company imported cotton par inhisar nahi karti. Company ka kehna hai ke woh har sensitive maloomat ko bar waqt Pakistan Stock Exchange (PSX) aur Securities and Exchange Commission of Pakistan (SECP) ke sath share karne ke liye pur-azm hai.
Company ke mutabiq, unka Unit-2 sirf Pure Viscose (PV) par mabni hai, jahan 100% PV yarn tayar ki jati hai. Jab ke Unit-1 mein polyester aur viscose yarn ka production jari hai, jo kay pichlay kai decades se operation mein hai.
Shadab Textile Mills ne yeh bhi wazeh kiya ke International Cotton Association (ICA) ki taraf se cotton importers ki blacklisting ke hawale se jo recent reports aayi hain, unka company ke operations ya financial position par koi asar nahi hai.
Company ka bayan:
Company apne shareholders ko yeh yaqeen dilate hain ke in reports ka company ke business operations par koi farq nahi parega aur humare stock ki trading par bhi koi asar nahi hoga. Isi wajah se, is khabar ko price-sensitive information nahi samjha jata.
