Islamabad: PTCL Group ne U Microfinance Bank Limited (U Bank) mein 15 arab rupay ki sarmayakari ki manzoori de di hai. PTCL, jo U Bank ki parent company hai, lagbhag 53 million dollar ke barabar is equity investment ke zariye bank ki growth aur digital transformation ko support karegi.
Yeh sarmayakari microfinance banking industry ki sab se bari equity investments mein se ek hai. Is ka maqsad U Bank ke digital banking platform ko mazid behtar banana, customers tak asaan rasai aur behter services ki farahmi ko yaqini banana hai.
U Bank ke Chairman aur PTCL Group ke CEO Hatem Bamatraf ne kaha ke yeh sarmayakari bank ki digital tabdili ki strategy par bharose ki aik numaya misaal hai.
U Bank ke President & CEO Turan Asif ne kaha ke yeh investment aik aham mor par ki gayi hai, jab bank 2026 mein apni digital transformation ke next phase mein dakhil honay ja raha hai. Bank ki strategy innovation, nai products aur services ke izafay par markooz hai, taa ke mulk bhar ke laakhon graahkon ko mazeed wasee mali sahulaten di ja sakein.
Bank ke mutabiq, pehli qist 4 arab rupay ki 31 December 2025 ko mosool ho chuki hai.
