Karachi: Pakistan Stock Exchange mein record saaz tezi ka silsila jari hai, jis ke natijay mein KSE-100 Index aaj bhi nayi buland tareen satah par pohanch gaya hai.

Karobari haftay ke pehle din bazar-e-hissas mein trading ka aaghaz hi musbat rujhan se hua aur ibtidayi awqat mein hi index mein 1,828 points ka numaya izafa record kiya gaya, jiss se KSE-100 Index barh kar 180,863 points ki satah par pohanch gaya.

Is ke baad bhi market mein tezi ka rujhan barqarar raha aur sarmayakaron ki bharpur dilchaspi ke sabab index mein mazeed izafa dekhne mein aaya. Din bhar ke dauran index ne mukhtalif marahil par 1,940, 1,999, 2,225, 2,357 aur phir 2,634 points ki record tezi hasil ki, jis ke saath KSE-100 Index 181,669 points ki nayi tareekhi buland satah ko chhoo gaya.

Karobari halqon ke mutabiq sood ki sharaah mein kami ki umeedein, maashi ashariyat mein behtri aur sarmayakaron ke itimad mein izafa, market mein jari is ghair mamooli tezi ki bunyadi wajohaat hain.