ISLAMABAD: Prime Minister (PM) Shehbaz Sharif ne mulki sanati aur zarai taraqqi ke liye “Roshan Ma’eshhat Bijli Package” ka ailan kar diya hai.
PM ne yeh ailan sanati aur zarai maharreen aur karobari baradari ke waft se mulaqat ke dauran kiya.
Package ke tehat sanat aur kisano ko November 2025 se October 2028 tak riyayati qeemat par izaafi bijli faraham ki jaayegi.
PM Shehbaz Sharif ne kaha ke sanati sector ko 34 rupey aur zarai sector ko 38 rupey per milne wale units ki qeemat kam kar ke aglay teen saalon tak 22 rupey 98 paisa per unit ke hisaab se bijli di jaayegi.
Unhon ne wazahat ki ke is package ka bojh na gharelo consumers par aayega aur na kisi aur sector par. Unhon ne Minister for Power Sardar Awais Leghari aur unki team ki koshishon ko saraha.
PM ne kaha ke sanat aur zara’at ki taraqqi mulk ki ma’eshhat aur rozgar ke liye buniyadi ahmiyat rakhti hai. Hukoomat business aur export growth ke liye poore azm ke sath qadam utha rahi hai.
Unhon ne yaad dilaya ke pichlay saal diye gaye winter package ke tehat sanati aur zarai sector ne 410 gigawatt izaafi bijli istemal ki, jis se baramadat mein izafa aur rozgar ke naye moqay paida huay.
PM Shehbaz Sharif ne kaha ke ma’ashi team ki mehnat aur awaam ke ta’awun se mulk ma’ashi istahkam ki janib barh raha hai. Unka kehna tha, “Jab sanat aur zara’at taraqqi karenge to Pakistan qarzon se nijaat paayega. Mujhe yaqeen hai ke aap sab ke ta’awun se hum Pakistan ki ma’ashi khudmukhtari ka hadaf hasil karenge.”
