Gallup aur D&B ne Pakistani maeeshat mein numaya behtari ka aitraf kar liya hai, jab ke bain-ul-aqwami rating agencies ne sarfeen ke aitmaad mein majmooi tor par 19 percent izafay ki tasdeeq bhi kar di hai.
March 2022 ke baad Pakistan ke zare mubadla ke zakhair 21.1 billion dollar tak pohanch gaye hain, jis se mulki maeeshat ko istihkam aur dawam mila hai. Maeeshat mein yeh tabdeeli SIFC ki behtareen sahulat kari, taawun aur lagataar koshishon ka nateeja qarar di ja rahi hai.
SIFC ki door-ras sahulat kari aur moassar muashi islahat ke sabab maali adam tahaffuz mein wazeh kami dekhi gayi hai. In islahat ke natije mein mulki aur ghair mulki investors ka aitmaad Pakistan ki maeeshat par pehle se zyada barh gaya hai.
Pakistan ki ubhartti hui maeeshat ke hawale se naujawan tabqa bhi pur-umeed hai aur apne muashi mustaqbil ko roshan dekh raha hai. SIFC har satah par maeeshat ko behtar banane ke liye hukumat ke sath mil kar kaam kar raha hai.
Maahireen-e-maeeshat ke mutabiq, Pakistan ne pichlay 28 se 30 mah ke dauran macroeconomic istihkam hasil kiya hai. Is arsay mein Pakistan ne beroni account mein daramadat ke barhtay hue dabao ko roka aur current account surplus hasil karne mein kamyabi paai hai.
