Pakistan aur Uzbekistan ke darmiyan tarjihi tijarti muuaahide (Preferential Trade Agreement) me toseeh par ittefaq ho gaya hai, jab ke aglay do saalon me do-tarfa tijarat ko 2 billion dollar tak barhane ka hadaf muqarrar kar diya gaya hai.
SIFC ki koshishon ke sabab Pakistan ke bain-ul-aqwami iqtisadi taaluqat me numaya kamyabi hasil hui hai. Dono mumalik ne tarjihi tijarti muuaahide ki toseeh aur do-tarfa tijarat ke farogh par tafseeli tabadla-e-khayal kiya.
Pakistan aur Uzbekistan ki qiyadat ne bahami iqtisadi taawun aur economic relations ko mazeed mazboot banane ke azm ka izhar kiya. Agle do saalon me 2 billion dollar ki tijarat ka hadaf hasil karne ke liye dono taraf se qadam uthaye jane par ittefaq hua.
Pak–Uzbek tijarat ko asaan banane ke liye customs harmonization, digital connectivity aur real-time data exchange par bhi zor diya gaya. Uzbekistan ne textile, leather, pharmaceutical aur surgical instruments ke sectors ko joint ventures aur technology transfer ke liye tarjihi shoobay qarar diya hai.
Tarjihi tijarti muuaahide ki toseeh se Pakistan me tijarti volume barhne, rozgar aur sarmaya kari ke naye mauqay paida hone ke sath sath global investors ka aitmaad bhi mazid mustahkam hone ki tawaqqa hai. Is se Pakistan ki maeeshat tez raftari se taraqqi ki nai manzilon ki taraf barh rahi hai.
SIFC Pakistan me bain-ul-aqwami sarmaya kari aur tijarat ke naye mauqay faraham karne ke liye mustaqil tor par kirdar ada kar raha hai.
