Aaj ke karobar ke aghaz ke sath PSX ne apni tezi ko barqarar rakha. Kal PSX ka index 724.99 points izafay ke sath 59,811.34 pe band hua tha, jabke karobari hujam 657 million shares tha.
Aaj index ne karobar ka aghaz guzishta roz ke muqablay mein 188.89 izafay ke sath 60,000.23 se shuru kiya. Sarmayakaron ko apni janib mutawajjah karte hue index 918.92 points izafay ke sath 60,730.26 pe band hua, jo ke Pakistani Stock Exchange mein ek tareekhi kamyabi hai.
Index ki tezi batati hai ke Pakistan ke karobari halqon ne PSX pe apna bharosa barqarar rakha hai aur karobar mein izafa karne ka irada kiya hai. Is upper trend mein, hukumat ki muashi hikmat-e-amli ka bharosa bhi ek ahem kirdar ada kar raha hai.
Mojooda hukumat ne mulk ki muashi mushkilat ko hal karne ke liye faislay kiye hain, jinhe karobari halqon ne saraha hai. Nigran wazeer-e-azam Kakar ki tijarat, port operations, water treatment plant, food security, aur karobari mufahimat ka UAE ke sath kiya gaya accords bhi is tareekhi izafay ki aham waja hain.
Sarmayakar aur gher mulki investors ki taraf se bhi PSX mein taqat aur izafa ka izhar hota hai. Guzishta dino mein masbat muashi khabron ka asar bhi mehsoos ho raha hai, aur PSX ne masbat andaz mein karobari din ka ikhtitamkiya hai.
60,730.26 918.92 (1.54%)
Article by: Muhammad Haseeb Khan
