Pakistan Oilfields Limited ne kaha hai ke TAL Block ke exploratory well Bilitang-1 mein hydrocarbons ki daryaft hui hai. Yeh well 10 August 2025 ko spud kiya gaya tha aur isey 4,011 meter ki gehrai tak drill kiya gaya.
Company ke mutabiq, operator MOL ke zariye kiye gaye Drill Stem Test (DST) ke natayij mein Hangu aur Lumshiwal formations se rozana 1.58 million standard cubic feet gas hasil hui hai. Yeh test 40/64″ fixed choke size par 164 psi flowing wellhead pressure ke sath anjaam diya gaya. Gas ki paidawar mazeed behtar banane ke liye acid job bhi jaari hai.
Lockhart formation ka DST bhi plan kiya gaya hai jiske hawale se mazeed information baad mein share ki jayegi.
Company ne wazeh kiya ke DST aik technical amal hai jis mein reservoir ki potential, pressure behavior aur fluid samples check kiye jatay hain, is liye final commercial production test results se mukhtalif ho sakti hai.
Pakistan Oilfields Limited ka pre-commercial working interest is project mein 25% hai.
