Pakistan ke mineral sector, khas tor par Balochistan, mein pehli dafa arbon dollar ki investment ka aaghaz ho gaya hai. SIFC ki sahulat kari se soobay mein investment ke sunahre dour ka aghaz hua hai.
Mulki satah ke top 5 business groups — Lake City Holdings, Fatima Group, Din Group, Hilton Group aur Soorty Group — ne Balochistan ke mineral sector mein arbon dollar ki investment ka elaan kar diya hai. In groups ki majmooi market value taqriban 5 billion US dollars batayi ja rahi hai.
Yeh aham peshraft Mari Energies ki subsidiary Mari Minerals aur Globakor Minerals Limited ke darmiyan Balochistan mein mineral exploration ke liye joint venture agreement ke baad samne aayi hai.
Joint venture agreement ke tehat Globakor Minerals Limited Balochistan ke mineral sector mein arbon dollar ki seedhi investment karegi. Is project ke tehat district Chagai mein sona, tamba aur deegar qeemti minerals ki talaash aur development ki jayegi.
Is mauqe par sabik wafaqi wazeer aur mashhoor sanatkaar Gohar Ejaz ne kaha ke mineral development ke aaghaz se mulk mein aman, taraqqi aur rozgar ke wasee mauqay paida honge. Unhon ne kaha ke Balochistan mineral wasail se mala maal sooba hai aur Pakistani companies ki direct investment soobay ki muashi simt badalne mein bunyadi kirdar ada karegi.
