Islamabad: State Bank of Pakistan (SBP) ke data ke mutabiq July se November 2025-26 ke darmiyan Pakistan ke exports ka kul volume 2.639 billion dollar raha, jo pichle saal ke usi muddat ke 2.514 billion dollar ke muqable mein 4.97% zyada hai.
Sab se zyada exports United States (US) ko kiye gaye. Is arsay mein America ko 2.639 billion dollar ke qareeb saman export kiya gaya.
Is ke baad doosre number par China raha, jahan Pakistan ki exports 982.984 million dollar rahi jo pichle saal 1.055 billion dollar thi — is tarah 6.84% kami record hui.
United Kingdom teesra bara export market raha jahan July–November ke arsay mein 904.908 million dollar ki exports hui, jo pichle saal 934.556 million dollar thi.
United Arab Emirates (UAE) ko Pakistan ki exports 833.366 million dollar rahi jo pichle saal 925.940 million dollar thi, jab ke Germany ko exports barh kar 716.065 million dollar tak pohanch gayi.
Holland ko 616.042 million dollar aur Italy ko 513.291 million dollar ki exports record hui. Spain ke liye exports barh kar 673.822 million dollar tak pohanch gayi.
Afghanistan ke liye exports me wazeh kami dekhi gayi jo 210.556 million dollar rahin, jab ke pichle saal 408.585 million dollar thin. Bangladesh ke liye exports 292.119 million dollar rahi jo pichle saal 315.335 million dollar thi.
France ko exports 220.588 million dollar aur Belgium ko 242.913 million dollar record hui. Saudi Arabia ke liye exports 272.232 million dollar rahin jo pichle saal 303.858 million dollar thin, jab ke Turkiye ke liye exports ghatt kar 82.495 million dollar tak reh gayin.
SBP ke mutabiq kuch markets mein numaya izafa jab ke kuch mein kami record hui, magar kul exports mein izafa musbat rujhan ka izhar karta hai.
