Islamabad: Global Economic Gallup Survey ke taza data ke mutabiq Pakistan ne maashi taraqqi aur aman ke hawale se Bharat par wazeh bartri hasil kar li hai. 2026 ke aaghaz par Pakistan ki performance economic outlook aur peace indicators dono mein behtar rahi.
Survey 60 mumalik mein conduct kiya gaya, jismein Pakistan bharat aur global average dono se aagay raha. Report ke mutabiq 51% Pakistani aanay walay saal ke liye pur-umeed hain, jab ke net positive rujhan 31% record hua. Taqreeban 53% logon ka kehna hai ke 2026 un ke liye khushhali ka saal hoga.
Aman ke hawale se bhi Pakistan ne behtar soorat-e-haal dikhai. 52% Pakistani tasawwur karte hain ke dunya mein aman barhega, jab ke Bharat mein yeh ratio sirf 26% hai. Yeh level 1994 ke baad sab se buland staron mein se ek hai.
Survey ke mutabiq Pakistan ne teen aham pehmanon — kul umeed, economic prosperity aur aman ki tawaqqo — mein global average se behtar kar k dikhaya, jab ke in mein se do pehmanon par Bharat ko bhi piche chhor diya.
Report ke mutabiq ghair yaqini global mahaul ke bawajood Pakistani awaam 2026 ke hawale se pur-aitemad aur pur-umeed hain.
