NETSOL Technologies Limited ki sub-subsidiary company, NETSOL Institute of Artificial Intelligence (Pvt.) Ltd., ne National Vocational & Technical Training Commission (NAVTTC) ke sath aik aham partnership sign ki hai jiske zariye 1600 afrad ko Artificial Intelligence (AI), Data Science aur Cybersecurity ki training di jaye gi.

Company ke mutabiq, yeh ta’awun Pakistan mein AI aur Cybersecurity ke skilled professionals ka mazboot talent pool tayar karne ki koshishon ka hissa hai, jo global technology market ki barhti hui demand ko poora karega.

NETSOL ke CEO aur Founder, Mr. Salim Ghauri, ne is partnership ko aik “milestone initiative” qarar dete hue kaha:

“Yeh qadam Pakistan ki digital economy ke vision ke mutabiq skilled digital professionals ka aik mazboot pipeline tayar karega. Is se future-ready talent ki kami door hogi aur NETSOL ka qaumi aur bain-ul-aqwami satah par tech competitiveness mazid behtar hoga.”