Islamabad: Hukoomat ne mali saal 2025–26 ki pehli sah mahi ke liye 3.7% maashi growth rate ki manzoori de di. Yeh manzoori National Accounts Committee (NAC) ne di, jis ka ijtima Secretary Planning Awais Manzoor Sumra ki sadarat mein hua.

Committee ke mutabiq pehli sah mahi mein GDP growth 3.71% rahi, jab ke zaraat, sanat aur services ke Tamam sectors mein growth note ki gayi. Bijli aur gas ke sector mein 25% se zyada, aur construction sector mein 21% se zyada growth note ki gayi.

Chawal ki paidawar mein bhi hairat angez izafa dekha gaya. Kasht ke raqbay mein 3.6% kami ke bawajood chawal ki paidawar 2.5% barh kar taqreeban 1 crore ton tak pohanch gayi, jab ke pehle 83–89 lakh ton ka andaza lagaya gaya tha.

NAC ke mutabiq July–September ke liye:

• Zaraat sector growth: 2.9%
  
• Sanati sector growth: 9.4%
  
• Services sector growth: 2.4%
  

Planning Commission ke mutabiq sailab se kul 744 arab rupay ka nuksan hua, jis ka sab se zyada asar zarayi sector par para, bawajood iske pehli sah mahi ki growth hukoomat ke liye behtar signal sabit hui.