Karachi: K-Electric ne Karachi ke bijli istemal karne walon par mazeed bojh dalne ki tayari karli hai. August ki fuel adjustment ki mad mein bijli ki qeemat 51 paise per unit barhane ki darkhwast NEPRA mein pesh ki gayi hai, jis par aaj NEPRA mein samaat hogi.
Details ke mutabiq, is izafay se Karachi ke electric consumers par 85 crore 30 lakh rupay ka additional bojh parega. Pehle hi, September mein K-Electric ke consumers ne purane monthly adjustment ke under ek rupiya per unit ada kiya hai, jab ke July ki adjustment ka faisla abhi tak NEPRA se aana baqi hai.
Zarai ke mutabiq, K-Electric ne July ki adjustment mein 3.9 rupay per unit ka izafa talab kiya hai. Yad rahe ke K-Electric ke consumers pehli se hi monthly aur quarterly adjustments ke lagataar bhari bojh ka samna kar rahe hain. September mein Karachi ke log monthly aur quarterly adjustments ke zariye 2.74 rupay per unit ada karenge, jab ke mulk ke doosray shehron ke consumers ko monthly adjustment mein 37 paise ka relief diya ja raha hai.
January se March 2024 tak, K-Electric ke consumers ko monthly adjustments mein ek rupiya per unit aur April se June 2024 tak ke quarterly adjustment mein 1.74 rupay per unit ada karna hoga. October aur November mein bhi K-Electric ke users par monthly aur quarterly adjustments ke under mazeed izafay ka bojh parega, jis me November mein 4.91 rupay per unit aur June ki adjustment ke liye 3.17 rupay per unit ada karna hoga.
