Karachi: International Monetary Fund (IMF) ne Pakistan ko 1.2 billion dollar ki agli qist jari kar di hai, jabke State Bank of Pakistan ne bhi IMF se qist waseel honay ki tasdeeq kar di hai.
State Bank ke hawalay se maloom hua hai ke Pakistan ko 1 billion dollar Extended Fund Facility (EFF) ke tehat milay, jabke 200 million dollar Climate Financing ki madad ke taur par jari kiye gaye.
Wazeh rahe ke IMF ke Executive Board ne pichlay din Pakistan ke liye is qist ki manzoori di thi. IMF ke mutabiq EFF aur Resilience and Sustainability Facility (RSF) ke tehat ab tak Pakistan ko majmooyi 3.3 billion dollar ki adaiygi ho chuki hai.
IMF ka kehna hai ke Pakistan ne EFF ke tehat islahati iqdamat mein numayan taraqqi ki hai, jis ki wajah se mushkil alamgir mahaul aur halia tabah kun sailabon ke bawajood maashi istehkam barqarar raha.
Institution ke mutabiq financial performance behtar rahi aur fiscal year 2025 mein primary surplus 1.3% record kiya gaya jo target ke mutabiq hai. Mehngai barhi zaroor, lekin IMF ka kehna hai ke ghizai supply chain ke masail ki wajah se yeh izafa aarzi hai.
Zar-e-mubadla zakhair barh kar 14.5 billion dollar tak pohanch gaye hain, aur aglay fiscal year mein mazeed izafay ki umeed hai.
Executive Board meeting ke baad Deputy Managing Director Nigel Clarke ne kaha ke Pakistan ki reforms ne mushkil halaat mein macro-economic stability barqarar rakhne mein aham kirdar ada kiya. Unka kehna tha ke growth outlook behtar ho raha hai, inflation expectations neeche aa rahi hain aur fiscal/bairooni khsaray kam ho rahe hain.
Magar unhon ne hidayat di ke global uncertainty ke dauran Pakistan ko mehdood magar moassar policies aur reform ki raftar ko tez rakhna hoga taa ke sustainable aur private-sector-led growth mumkin ho sake.
