Islamabad: Wazarat-e-Khazana ne wazahat ki hai ke Pakistan ke liye IMF ke tehat jari islahat koi nayi sharaait nahi hain, balkeh yeh phased aur medium-term reform agenda ka hissa hain jo pehle hi IMF ke saath tay pa chuka hai۔

Press release mein kaha gaya ke IMF ka Extended Fund Facility (EFF) program is liye tayar kiya gaya hai ke mulk mein structural reforms ko dheere dheere aur marhala war andaaz mein nafiz kiya ja sake, taake pehle se mutaaiyan shuda policy objectives hasil ho saken۔

Wazarat ke mutabiq har IMF review pichli islahat par bunyaad rakhta hai aur reforms ko step-by-step aagay barhaya jata hai۔ Haliya dinon mein “new conditions” ke hawalay se anay wali comments haqeeqat par mabni nahi, kyun ke yeh qadam ya to pehle se jari reforms ka extension hain ya unka logical continuation hain۔

MoF ne zor diya ke hukumat Pakistan IMF ke saath mil kar agreed reform roadmap par amal kar rahi hai, jis ka maqsad maeeshat mein istehkaam, behtari aur dairpa growth ko yaqini banana hai۔

Wazarat-e-Khazana ka kehna hai ke reforms ka yeh silsila kisi aik qist ya aik faislay tak mehdood nahi, balkeh poore program ke dauran tasalsul ke saath aagay barhta rahe ga۔