BYD ne aik martaba phir duniya ki sab se bari New Energy Vehicle (NEV) manufacturer hone ka aizaz hasil kar liya hai. Company ki 2025 mein global sales 46 lakh units se zyada rahi, jis se BYD ne apni number 1 position barqarar rakhi.
Press release ke mutabiq, yeh kamyabi electric aur hybrid gaariyon ke sector mein BYD ki musalsal taraqqi ko zahir karti hai, jo advanced technology, behtar product quality aur customer-centric approach ki wajah se mumkin hui.
BYD ke liye international level par bhi 2025 aik aham saal sabit hua, kyun ke pehli martaba aik hi saal mein overseas sales 10 lakh units se tajawuz kar gayi. Is se BYD ke products par global consumers ke barhte hue aitmaad ka andaza hota hai.
BYD Pakistan ke Country Head, Lei Jian ne kaha ke 2025 company ke liye aik landmark saal raha. Unka kehna tha ke “record sales ke sath sath humein China ke bahar bhi BYD vehicles ki zabardast acceptance dekhne ko mili hai.”
Unhon ne mazeed kaha ke Pakistan mein 2024 ke launch ke baad BYD ATTO 3, BYD SEAL aur BYD SHARK 6 jaise models ne consumers mein kaafi josh paida kiya hai, jo is baat ka saboot hai ke Pakistani buyers advanced automotive technology ko khulay dil se apna rahe hain.
BYD Auto ka qiyam 2003 mein hua tha aur yeh sustainable innovation par focus rakhne wali global high-tech company BYD ka automotive arm hai. Company pure electric aur plug-in hybrid vehicles banati hai aur batteries, electric motors aur electronic control systems tak mukammal NEV value chain mein expertise rakhti hai.
BYD ne Blade Battery, DM-i aur DM-p hybrid systems, e-Platform 3.0, CTB, iTAC, DiSus Intelligent Body Control System aur XUANJI Architecture jaisi industry-leading technologies bhi introduce ki hain.
Company duniya ki pehli automaker hai jis ne fossil-fuel vehicles ki production mukammal tor par band kar ke new energy mobility ki taraf rukh kiya. China mein bhi BYD guzishta aik dihai se new energy passenger vehicles ki sab se zyada bikne wala brand rahi hai.
Mazboot 2025 performance BYD ki long-term strategy ko mazid mustahkam karti hai. Company ka kehna hai ke research & development mein lagataar investment aur international markets mein barhti maujoodgi ke sath BYD mustaqbil mein bhi sustainable mobility ko farogh deti rahe gi, Pakistan samait.
