ISLAMABAD: Pakistan ki mqaami auto industry abhi tak ke sab se bad-tareen dabao ka saamna kar rahi hai. Bhari taxation, import policies ka imbalance, aur used cars ki record toar par belagam aamad ne is aham sector ko bohot gehri mushkilat mein dhakel diya hai.
Ye situation is liye bhi bohot tashweeshnaak ban chuki hai kyun ke auto industry GDP ka 2% provide karti hai, aur trained Pakistani technicians har saal $600 million se zyada zar-e-mubadla mulk bhejte hain. Sirf FY2025 mein industry ne 700 billion rupees se zyada taxes ada kiye lekin production, robotics aur workforce me girawat is crisis ki clear tasveer deta hai.
Auto companies ka kehna hai ke agar taxes ko rationalize kar diya jaye aur used cars import ko strict regulation me le aya jaye toh production phir se behtar ho sakti hai aur laakhon rozgar mehfooz kiye ja sakte hain.
Pakistan Asia ka wo wahid auto manufacturing mulk ban gaya hai jahan used cars ka market share 25% tak ja chuka hai (Dec 2024–Dec 2025). Jabke India me ye ratio zero, Vietnam me 0.3%, aur Thailand me 1.2% hai. Sector experts ke mutabiq ye ek policy contradiction hai—region apni manufacturing ki hifazat karta hai, jab ke Pakistan me us ka ulta ho raha hai.
30 September 2025 ke Notification 1895 ke baad 5 saal purani cars import karne ki ijazat ne market ko aur zyada distort kar diya. Kahi reports ke mutabiq June 2026 ke baad yeh limit tamam tor par khatam bhi ki ja sakti hai, jis se used cars ki aamad bohot zyada barhne ka imkaan hai.
Pakistan ka auto sector abhi 1,200 factories, 2.5 million jobs, Rs 500 billion annual revenue aur $5 billion FDI par mabni hai — lekin inconsistent policies aur used imports ne industry ko bohot nuksaan pohanchaya hai. Papam ke senior vice chairman ke mutabiq, Dec 2024–Dec 2025 ke darmiyan 45,758 imported cars me se 99% Japan se aayi.
Papam ke ex-chairman Abdul Rahman Aziz ne kaha ke State Bank, FBR, Excise Departments ke darmiyan coordination ka fawqan hai. Cars ek individual ke naam import hoti hain, registraton kisi aur naam par hoti hai — yaani misuse aam hai. 99% used cars port se seedha showroom chali jaati hain, baghair kisi usage condition ke.
Industry estimates ke mutabiq local vendor industry ne is dauran Rs 50 billion ka nuksaan uthaya. Foreign exchange bhi hit hua — local manufacturer ki per-unit banking import cost $10,138 hai jabke used car importer per-unit $14,010 kharch karta hai (jiska ba-hissa non-documented hota hai).
Experts kehte hain ke Pakistan jis direction me ja raha hai wo global auto manufacturing trend ke bilkul opposite hai. Policy makers ke liye asli sawal ye hai ke import honi chahiye ya nahi, balke kitni quantity me honi chahiye aur kya yeh trend mulk ke economic targets se match karta hai ya nahi.
Car importer Naveed Mudasar ke mutabiq agar 5 saal purani cars ke misuse ko rok liya jaye toh industry ko recovery ka mauqa mil sakta hai. Papam ke ex-chairman Nabeel Hashmi kehte hain ke tax reforms aur import system ki sudhaar se Pakistan apni lost position recover kar sakta hai, aur future me cars export karne ki salahiat bhi paida ho sakti hai.
Industry experts ka kehna hai ke auto sector mulk ki economy ka core pillar hai aur is waqt sahi direction me policy reforms ka intezar kar raha hai. Ministry of Industries ke officials ne confirm kiya hai ke used car imports ke misuse ko rokne ke liye regulations aur strict kiye ja rahe hain. Saath hi new Auto Policy finalize ho chuki hai aur jald PM ko brief ki jayegi — jisme taxation, tariffs, localization ke issues address kiye jayenge.
Officials ka kehna hai ke new Auto Policy se industry ko revival, stakeholders ke issues ka hal, aur local manufacturing ko strong support milegi. Sahi qadam bardari se na sirf auto sector revive hoga balke mulk ki economy bhi poori raftaar se chal sakti hai.
