Karachi:
Bank Alfalah Limited (BAFL) ne kaha hai ke usay Afghanistan mein apne operations ki possible sale ke hawale se aik aham regulatory approval mil gaya hai. Bank ke mutabiq Ghazanfar Bank, Afghanistan ne BAFL ki Afghanistan operations kharidne ke liye non-binding offer diya tha.
Is hawale se State Bank of Pakistan ne Ghazanfar Bank ko in-principle approval de diya hai jiske baad woh Bank Alfalah ki Afghanistan operations ki due diligence ka amal shuru kar sakta hai. Isi tarah Central Bank of Afghanistan ne bhi Ghazanfar Bank ko due diligence ki ijazat de di hai.
Bank Alfalah ne kaha hai ke ab Ghazanfar Bank ko due diligence process aagay barhane ki ijazat de di jayegi.
Company ke mutabiq yeh muamla due diligence ke kamiyab ikhtitam, final agreements, qanooni aur regulatory zarooriyat puri karne aur Pakistan aur Afghanistan ke relevant authorities se tamam approvals milne par hi mukammal hoga.
