Islamabad:
Government ne property files aur plots se mutaliq fraud ke khilaf sakht action ka faisla kar liya hai. Prime Minister ne is silsile mein awaami hifazat aur transparency ke liye high-level committee qaim karne ke hukam de diye.
Committee property files, plots, villas aur apartments ki khareed o farokht ki qanooni haisiyat ka jaiza legi. Committee fraud, tax chori aur sarmaaya karon ke tahaffuz se jure masail par recommendations tayar karegi.
Committee ki sarbarahi Minister of Law karenge jab ke:
- Chairman FBR
- Subon ke Senior Members Board of Revenue
- NAB ka representative
- Chief Commissioner ICT
- ABAD ka representative
committee ka hissa honge.
Committee ko yeh zimmedari di gayi hai ke wo:
- file system ka practical tareeqa-e-kaar aur legal status check kare
- federation aur provinces ke revenue par asraat ka jaiza le
- file holders aur kharidaron ke huqooq ka tahaffuz yakini banaye
- double files, jali files aur aik hi jayedad kay bar bar bechne jese fraud cases dekhay
Committee qawaneen mein zaroori tarmeemaat ki sifarish bhi karegi taa ke property files ki khareed o farokht ko aik wazeh aur qanooni daire mein laya ja sake.
Committee ko 1 mah ke andar report pesh karne ki hidayat ki gayi hai.
Reports ke mutabiq yeh committee aik baray housing scandal kay baad banai gayi, jahan baghair zameen ke 90 hazaar se zyada plots bechne ka inkishaaf hua tha.
