Saal 2025 mein Pakistan ki fisheries industry ki exports mein 19% izafa record kiya gaya, jab ke pichlay do saalon mein kul taqreeban 40% tak barh gayi hain.
DG Marine Fisheries Pakistan, Dr. Mansoor Ali Wassan ke mutabiq, FY 2023-24 mein 406 million dollars ki fish exports hui thin, jab ke FY 2024-25 mein yeh barh kar 489 million dollars ho gayin. Is saal bhi isi raftar se izafa jaari hai.
Unhon ne bataya ke America ko fish export se mutaliq 2018 se latka hua masla bhi 2025 mein hal ho gaya hai. Ab Pakistan American Marine Mammals Act par amal kar ke America ko fish export kar sakta hai. Jhenga (shrimp) export ke liye bhi aham progress hui hai aur aglay saal ke darmiyan ijazat milne ki umeed hai.
Is saal deep sea fishing licenses ka masla bhi hal kar diya gaya hai aur licenses jari karne ki manzoori di ja chuki hai.
Hakumat ne 2025 mein National Fisheries & Aquaculture Policy bhi tayar ki hai jisse fisheries aur aquaculture sector ko mazeed taqat milegi.
