Federal Board of Revenue FBR ke zair-e-intezam subsidiary office Corporate Tax Office (CTO) Lahore ne tax qawaneen par amal daramad ko yaqini banate hue bari enforcement karwai anjaam di hai aur 2 arab 64 crore 60 lakh rupay wasool kar liye hain.
FBR ke mutabiq yeh raqam ek aise taxpayer se wasool ki gayi jo income tax ke baqaya jat ada nahi kar raha tha aur apni qanooni zimmedariyan poori nahi kar raha tha. Tashkheesi karwai mukammal honay ke baad qanooni zarooriyat puri kar ke yeh wasooli ki gayi.
Bayaan mein kaha gaya ke CTO Lahore ne na sirf aik hi case mein khatir khwah raqam ka tax aaid kiya balkeh mutaliqa qawaneen ke tehat tamam qanooni takazay or professional tareeqay se kaam poora kiya aur rakam ki wasooli yaqini banai.
FBR ka kehna hai ke yeh wasooli FBR aur uski field formations ki bari asamiyaat par kaam karne ki salahiyat aur qanoon nafaz karne ke azm ki numayandagi karti hai. Yeh qadam shadeed na-dahindagi ke maamlaat se nimatne ke liye FBR ke mazboot moqaf ko bhi zahir karta hai.
Member IR Operations ne CTO Lahore ke afsaran ki koshishon ko saraha aur kaha ke volunteer compliance ko barhawa dene ke sath sath non-compliance ke khilaf faisla-kun qadam jari rahenge.
