PIA ki privatization ki race mein ab sirf teen pre-qualified groups reh gaye hain. In mein Air Blue ke ilawa Lucky Cement aur Arif Habib Corporation ki qiyadat mein do consortiums bhi shamil hain.
Privatization Commission ke mutabiq, 75 percent shares ki sale se hasil honay wali raqam ka 92.5 percent PIA mein investment ke liye istemal kiya jaye ga, jabke 7.5 percent raqam hukumat ko transfer ki jaye gi.
Commission ke officials ka kehna hai ke mumkina investor ko PIA ko apne paon par khara karne ke liye aglay 5 saalon mein 80 billion rupay ki investment karna hogi.
Deal ke tehat investor ko aviation, cargo business, training wing aur kitchen business milay ga. Is ke sath PIA ke mulazmeen ko aik saal tak job protection dena bhi sharaait mein shamil hai, jab ke pension aur retirement ke baad ke benefits holding company ki zimmedari honge.
Naye malikan maujooda mulazmeen ki tankhwahon aur maraat ke zimmedar honge, jab ke idaray ke maali istehkaam ke liye fori investment aur professional management ko zaroori qarar diya gaya hai.
