Islamabad: Wafaqi hukumat ne anti–money laundering (AML) aur counter terrorism financing (CTF) ko mazeed moassar banane ke liye gold samait qeemti dhaaton ke karobar ki sakht nigraani ka faisla kar liya hai.
State Bank of Pakistan ne trade-based money laundering ki rok thaam ke liye naya nigraani nizaam nafiz kar diya hai. Wizarat-e-Khazana ke mutabiq, is qadam ka maqsad mulk mein money laundering aur terror financing ke khilaf nizaam ko mazboot banana hai.
Hukamran idaron ke mutabiq real estate agents, dealers aur is sector se wabasta afraad ki regular monitoring ki jayegi, jab ke tamam Non-Financial Businesses and Professions (NFBPs) ko bhi moassar nigraani ke daire mein laya jayega.
IMF ke mutabiq Pakistan ko trade-based money laundering ke khatarat ka samna hai, jis ke pesh-e-nazar FBR, State Bank aur Financial Monitoring Unit (FMU) mushtarka tor par is ke muashi asraat ka jaiza le rahe hain.
Wizarat-e-Khazana ne bataya ke National Risk Assessment Report March 2026 tak mutaliqa idaron ko faraham ki jayegi. Is ke ilawa SECP ne July 2025 mein Central Beneficial Ownership Registry qaim ki thi, jo January 2026 tak mali idaron aur qanoon nafiz karne wale idaron ke liye online dastiyab hogi.
Wazeh rahe ke Pakistan October 2022 mein FATF ki grey list se nikal chuka hai aur Financial Action Task Force ki sharait aur sifarishat par musalsal amal daramad jari hai.
