Islamabad: Federal Board of Revenue (FBR) ne Prime Minister Shehbaz Sharif ki hidayat par Islamabad mein jaaidad par tax wasooli ke liye muqarrar nai valuation ko muattal kar diya hai, jab ke is hawale se baqaida notification bhi jari kar diya gaya hai.
FBR ke mutabiq, mulk bhar mein valuation tables ki 29 October 2024 ko nazar-e-sani ki gayi thi, lekin Islamabad mein Federal Tax Ombudsman ke paas zair-e-iltewa shikayaat ke sabab yeh amal moakhir raha. Baad azan 8 December 2025 ko Islamabad ke liye SRO jari kiya gaya tha, jise Chambers of Commerce & Industries aur real estate sector ne haqeeqi market rates se zyada qarar dete hue mustarad kar diya tha.
Tijarati tanzeemon aur real estate sector ne SRO wapas lene ka mutalba kiya aur is hawale se Prime Minister se bhi rujoo kiya gaya. Real estate sector se wabasta afraad ka kehna tha ke nai valuation tables ke nafaz se property par tax, asal market value se bhi zyada ho gaya tha, jo sector ke liye nuqsan-deh sabit hota.
Prime Minister ki hidayat par FBR ne awam aur real estate sector ke aitraazat ka jaiza liya, jin mein se kuch aitraazat durust tasleem kiye gaye. Is ke baad Islamabad ke liye valuation tables ki dobara jaanch partaal aur az-sar-e-nau taayun ka faisla kiya gaya.
Notification ke mutabiq SRO 2392(1)/2025 ko 31 January 2026 tak ya revised SRO ke ijra tak (jo bhi pehle ho) muattal rakha jayega.
