Karachi: TPL Corp Limited ne apni pehle ki announcement (08 September 2025) ke silsile mein aham taraqqi se aagah kar diya hai. Company ke Board of Directors ne Jazz International Holding Limited ko TPL Insurance Limited ke shares aur control ke mumkinah acquisition ke liye final approval de di hai.
Company ke mutabiq, Board of Directors ka ijlaas 17 December 2025 ko subah 11:00 baje munaqid hua, jis mein Jazz International Holding Limited ke sath Share Purchase Agreement (SPA) sign karne ki manzoori di gayi. Is transaction ki takmeel mutaliqa qawaneen ke tehat tamam zaroori approvals hasil hone se mashroot hogi.
Wazeh rahe ke is deal ke hawale se pehle acquirer ka naam VEON Group Holding Company Limited ya is ki subsidiaries/associated entities bataya gaya tha, jo baad mein Jazz International Holding Limited ke taur par final kiya gaya. Is tabdeeli ki ittila Arif Habib Limited, jo ke Manager to the Offer hain, ki janib se 16 December 2025 ko jari announcement mein di gayi thi.
Company ne kaha hai ke is transaction se mutaliq mazeed taraqqiyat se stakeholders ko barwaqt aagah kiya jata rahega.
