ISLAMABAD: Economic Coordination Committee (ECC) ne oil marketing companies (OMCs) aur dealers ke margins me izafa manzoor kar diya hai, jis ke baad awaam par additional burden parne ka imkaan hai. Faislay ke mutabiq, OMC margin Rs 1.22 per litre tak barh jayega, jab ke petrol aur diesel ki qeematon me Rs 2.56 per litre tak izafe ka khadsha hai. Is me se Rs 1.28 per litre ka boojh foran consumers ko transfer ho jayega.
Express News ke mutabiq, ECC ke ijlaas me bataya gaya ke petrol per OMC margin Rs 1.22 tak barh jayega, jab ke diesel per dealers’ commission me Rs 1.34 per litre ka izafa hoga.
Wazarat-e-Khazana ke jari karda aelaniya ke mutabiq, petroleum products par dealers aur OMCs ke margins me 5% se 10% tak izafa manzoor kar liya gaya hai. Margin me se aadha izafa foran lagu hoga, jab ke baqi aadha digitalization se mushroot rakha gaya hai. Petroleum Division ko 1 June 2026 tak apni report pesh karne ki hidayat di gayi hai.
Ijlaas me circular debt management plan ka detail review kiya gaya aur power sector ki financial sustainability ko yakeeni banane par ghour hua. ECC ne Power Division ko mid-term plan tayar karne ki hidayat bhi di.
Is ke ilawa, Discos targets ki monitoring ke liye follow-up mechanism banane ki hidayat bhi di gayi, taa ke power sector reforms par effective implementation ho sake.
