KARACHI: Governor State Bank Jameel Ahmed ne kaha hai ke Pakistan ke berooni qarzon mein wazeh kami aayi hai aur 2022 ke baad se is mein koi izafaa record nahi hua.
Karachi mein World Women’s Entrepreneurship Day ki ceremony ke baad media se baat karte hue unhon ne bataya ke Debt-to-GDP ratio 31% se ghatt kar 26% par aa gaya hai, jab ke 2015 se 2022 tak Pakistan ka qarz saalana 6.4 billion dollar barh raha tha.
Governor SBP ke mutabiq, ravaan saal current account 0 se 1% GDP deficit ke darmiyan rahega, aur imports barhne ke bawajood current account manageable hai.
Unhon ne further kaha ke is saal remittances 40 billion dollar cross kar jayengi, jabke pichle saal 38 billion dollar remittances mili thin.
Jameel Ahmed ne ye bhi bataya ke Nov 2024 se Oct 2025 tak khawateen ke liye 50 billion rupay financing ka target tha, magar 230 billion rupay issue kiye gaye.Isi tarah, SMEs financing 550 billion se barh kar 700 billion rupay ho gayi, jo aik significant growth hai.
