KARACHI: K-Electric ke Chief Executive Officer (CEO) Munees Abdullah Alvi ne kaha hai ke multi-year tariff mein ki gayi katoti ke asraat consumers par parenge.
Unhon ne kaha ke NEPRA ne K-Electric ke multi-year tariff mein bara paimana par tabdeeliyan aur kami ki hai. Is saal June mein jari hone wala tariff dhai saal ki mushawarat, tehqiqat, aur azad zaraye se data verification ke baad final kiya gaya tha.
Munees Alvi ne kaha ke “Dhai saal ke ghour o fikr ke baad banaya gaya tariff chand maah mein mukammal tor par badal diya gaya hai.”
Unke mutabiq, K-Electric ab naye revised tariff ke mutabiq operations ko sustain karne ke liye strategy ka jaiza le rahi hai.
CEO ne kaha ke intizamia ki purzor koshish hai ke consumers par asar kam se kam ho, lekin tariff cut ke kuch asraat laazmi tor par un tak pohanch sakte hain.
K-Electric ke intizami board ko revised tariff aur us ke financial asraat ke mutaliq tafseelat se agaah kar diya gaya hai.
