KARACHI: Pakistan ne Afghan Taliban hukoomat ke sath Doha mein tay panay walay “foori jang bandi” moahide ke tanazur mein Afghan Transit Trade ko 10 din ki mauqoofi ke baad marhala war tor par bahal kar diya hai.

Mukhtalif maqamat par phansi hui 300 se zyada gaariyon ki clearance ka amal ab shuru kar diya gaya hai.

Initially, Chaman border ke zariye transit trade operations bahal kiye gaye hain. Directorate of Transit Trade (Customs) ne ek tafseeli hukam nama jari kiya hai jis me cargo operations ko 3 marahil mein mukammal karne ka plan diya gaya hai.

Pehle marhale mein un 9 gaariyon ko clear kiya jaayega jo Friendship Gate par sarhad band honay ke bawajood wapas bheji gayi thin. In gaariyon ka dobara wazan aur scanning ki jaayegi, aur kisi bhi tanaquz ki surat mein 100% checking ki jaayegi.

Doosray marhale mein un 74 gaariyon ko process kiya jaayega jo NLC Border Terminal Yard se wapas ki gayi thin. Unka bhi dobara wazan aur scanning hogi aur agar koi farq paaya gaya to mukammal talashi li jaayegi.

Teesray marhale mein Halting Yard mein mojood 217 gaariyon ko clear karke sarhad paar bhejne ki ijazat di jaayegi.

Hukam name ke mutabiq, tamam wapas aane wali ya roki gayi gaariyon ki tasaveer aur movement record Friendship Gate par hasil karke record mein safe kiya jaayega taake shafafiyat aur documentation ko yaqini banaya ja sake.

Transit Trade ki bahali se tajiron, transporters aur cargo operators ko bara relief milne ki umeed hai, jinhein sarhadi bandish ke dauran nuksaan ka samna karna para.

Hukamranon ke mutabiq, bahal shuda trade operations mein security aur inspection process aur sakht kar diya gaya hai taake smuggling aur ghair qanooni tijarat ko roka ja sake.

Chaman border ko Pak-Afghan tijarat ka sabse aham zamini raasta qarar diya jata hai jahan se rozana darjanon trucks aur cargo consignments dono mumalik ke darmiyan guzarti hain. Transit Trade ki bahali se na sirf sarhadi tijarat mein rawani paida hogi balkay dono mumalik ke darmiyan tijarati ta’alluqaat bhi behtar honay ki umeed hai.