Islamabad: Pakistan ke Exploration & Production sector ke liye ek ahem taraqqi hui hai, jahan Mari Energies aur Oil & Gas Development Company Limited (OGDC) ne mil kar Waziristan Block ke Spinwam-1 exploratory well se gas aur condensate ki kamiyaab daryaft ka elan kiya hai. Yeh block North Waziristan, Khyber Pakhtunkhwa mein waqia hai, aur yeh iss ilaqay ka doosra exploratory well hai.
Drilling Operations aur Initial Testing
Drilling ka aghaz 28 May 2024 ko hua tha, aur well ne 4,400 meters ki gehraai tak pohch liya hai. Pehli testing ke mutabiq, well se 12.96 MMSCFD gas aur 20 bbl/day condensate nikalne ki umeed hai. Yeh pehlay phase ke numbers hain, jo further appraisal ke baad mazeed behtar ho sakte hain.
OGDC aur MARI ke Earnings par Asar
Agar yeh discovery commercial viability prove kar leti hai, toh yeh OGDC aur MARI dono ki earnings ke liye positive impact layegi. Analysts ke mutabiq, is daryaft ka OGDC ke earnings per share (EPS) par PKR 0.24 ka asar ho sakta hai, jab ke MARI ka EPS PKR 1.36 barhne ki umeed hai.
Yeh nayi daryaft hydrocarbon resource base ko mazid mazboot karegi aur dono companies ke reserve replacement ratios aur production outlook ko behtar banayegi. OGDC aur MARI ke investors ke liye yeh ek growth catalyst sabit ho sakti hai.
Article by Muhammad Noman, Founder & Editor in Chief, Pakistan’s 1st Urdu Roman News
