Islamabad: Muashi maharreen ke mutabiq naya saal 2026 Pakistan ki maeeshat ke liye faisla kun sabit ho sakta hai. 2025 mein muashi istehkam ke baad ab asal imtihan yeh hai ke kiya is istehkam ko tez aur mustahkam taraqqi mein badla ja sakta hai ya nahi.
Pichlay chand saalon se GDP growth mushkil se abadi ki raftaar ke barabar reh saki hai, jis se awam ki aamdani par dabao aur hamsaya mumalik se faasla barhta chala gaya.
Economists ka kehna hai ke agar istehkam ko rozgar aur aamdani mein izafe mein tabdeel na kiya gaya to islahaat ke liye awaami himayat kamzor par sakti hai.
Muaashi maharreen ke mutabiq 2026 ka bara challenge istehkam se aage barh kar inclusive aur sustainable growth hasil karna hai. Is waqt mwaqeh maujood hai kyun ke global commodities, khas taur par tail ki qeematain munasib hain, remittances mazboot hain aur Pakistan Stock Exchange ki zabardast performance sarmayakaron ke barhte bharose ki aaina daar hai.
Economy ko mustahkam banane ke liye chaar bunyadi tarjeehat samne aayi hain:
- Sanati aur zarai sector ki bahali
- Services sector mein hukoomati mudakhlat kam karna
- Global economy ke sath deeper management
- Governance aur idaron mein islahat
Sanati taraqqi ke liye sirf textile par inhisar se nikal kar high–value engineering products, jaise mobile phones, defence equipment aur consumer durables ki tayaari wazeh di gayi. Defence production mein salahiyat ke bawajood Pakistan ka hissa abhi bhi aalamgir satah par kam hai.
Zarai sector mein bunyadi saakhti masail hal karne, behtar beej, technology aur financing tak rasaai aasaan banane aur rivayati faslon par bhari subsidies ki bajaye, horticulture, daalain aur oilseeds par tawajjo dene ki zarurat par zor diya gaya
Telecom aur energy sectors mein bhi hukoomati baladasti ko kam kar ke niji sarmayakari barhane ki salah di gayi hai, jis se broadband, 5G aur taqat ki taqseem behtar ho sakti hai.
Experts ke mutabiq agar zaroori islahaat par amal ho gaya to agle paanch saalon mein growth 5 se 6.5% tak barh sakti hai.
